Улаанбаатар хотын Захирагч Д.Сумъяабазар төвийн зургаан дүүргийн удирдлагуудтай уулзаж, ирэх жил хийхээр төлөвлөж байгаа явган болон дугуйн зам, ногоон байгууламжийн талаарх мэдээллийг нь сонсжээ. Тухайлбал, Сонгинохайрхан дүүргийн хувьд 64 байршилд чөлөөлөх шаардлагатай 1559 гарааш байснаас энэ жил 1234-ийг чөлөөлж, эхнээс нь явган болон дугуйн зам тавиад эхэлжээ. Харин Хан-Уул дүүргийн удирдлагууд Эко коридор байгуулахаар төлөвлөснөө танилцуулсан байна.
Энэ үеэр одоо байгаа дугуйн болон явган зам, мөн үүнийг хэрхэн нэмэгдүүлэх, түгжрэлийг бууруулах чиглэлээр хийх богино хугацааны төлөвлөлтийн талаар яригджээ. Тухайлбал, нийслэлийн төв хэсэгт 31.4 км дугуйн зам байна. Гэвч эдгээр зам нь явж байгаад тасардаг, хоорондоо холбогдоогүй гэх мэт асуудал байгаа юм. Иймээс эдгээрийг холбох, иргэд дугуйн замаар зорчиж ажилдаа явах нөхцөлийг бүрдүүлэхэд 31.5 км явган болон дугуйн зам шаардлагатай байгааг судалгаагаар тогтоожээ.
Хотын дарга “Дугуйн болон явган зам тавихдаа иргэдийн зорчих хөдөлгөөний урсгалыг тооцож, бодит төлөвлөлт хийх хэрэгтэй. Иймээс дүүргийн удирдлагууд замын трасс гаргаж, Нийслэлийн Бодлогын судалгаа шинжилгээний төвийн тооцоо судалгаатай уялдуулах шаардлагатай. Явган замыг хамгийн багадаа гурван метр өргөн байхаар төлөвлөх хэрэгтэй.” хэмээсэн байна.
“Рио Тинто Монгол” ХХК-тай хамтран ажиллах хоёр талт гэрээгээр гэр хорооллын бүсийн хоёр байршилд цэцэрлэгт хүрээлэн байгуулахаар болсон билээ. Тэгвэл тус цэцэрлэгт хүрээлэнг хаана байгуулах талаар дүүргийн удирдлагуудтай санал солилцож олон улсын жишигт нийцсэн цэцэрлэгт хүрээлэнг байгуулж үүнийг даган гэр хороололд бүтээн байгуулалт өрнөж, бизнес өргөжнө гэдгийг онцлов.
Хотын дарга уулзалтын төгсгөлд дүүргийн удирдлагуудад хаана, ямар ногоон байгууламж, явган болон дугуйн зам барих талаарх төлөвлөлтөө долоо хоногийн дотор бэлтгэж, Нийслэлийн Бодлогын шинжилгээний хүрээлэнгээс гаргасан судалгаатай нэгтгэж, 14 хоногийн дараа нэгдсэн төлөвлөлтөө танилцуулах үүрэг өглөө.
2022 Ⓒ City of Nomads. Зохиогчийн эрх хуулиар хамгаалагдсан.
Leave a Reply