Зайсан Толгой нь Улаанбаатар хотын өмнө зүгт байрлах, Богд хан уулын өвөрт орших толгой юм. Богд Жавзандамба хутагтад бараалхах гэж холоос ирсэн шавь нар нь тус толгойн ар өврөөр бууж амраад бэлтгэлээ базаадаг байсан бөгөөд отгийн зайсангууд голлон тус толгойд тахиж ёс үйлддэг байснаас Зайсан толгой хэмээн нэрлэдэг болжээ. Зайсан гэдэг нь цол хэргэмийн нэр байжээ. Харин өнөө үед Зайсан нь Улаанбаатар хотыг тольдон харах боломжтой гол цэг тул иргэд, жуулчдын очих дуртай гол газруудын нэг болжээ. Мөн Зайсан нь орчин цагийн Улаанбаатар хотын тансаг зэрэглэлийг тодорхойлж буй үнэ цэнтэй бүс болон өөрчлөгдсөн. Энэ хэсэгт тансаг зэрэглэлийн орон сууц, хотхон, оффисын барилгууд төвлөрсөн онцлогтой. Мөн Богд хан уулын өвөрт байрладаг гэдгээрээ хамгийн эрүүл агаартайд тооцогдож, Богд хан уулын орой Цэцээ гүн рүү гарах, ууланд алхах зэрэг эрүүл амьдралын хэв маяг цогцолсон бүс юм.